Господи Иисусе Христе Боже наш, давый нам овы апостолы, овы же пророки, овы же благовестники, овы же пастыри и учители к совершению Святых, в дело служения, в созидение Тела Твоего! Молим Тя, Владыко Многомилостивый, услыши молитвенный глас наш и помяни во Царствии Твоем преставльшихся из дольняго мира сего в мир горний рабов Твоих: православных Патриархов, митрополитов (имена), архиепископов и епископов (имена), архимандритов, игуменов, иеромонахов, иереев (имена), иеродиаконов и диаконов (имена); водвори их, Господи, в небесные кровы вечнаго покоя. Яко послуживших ко славе Пресвятаго имене Твоего и во славу Святая Соборныя и Апостольския Церкви Твоея, к назиданию и спасению чад Ея; помяни и всех в монашеском чине и причте церковном Тебе послуживших. Молим Тя, Господи Иисусе Христе Боже наш, молим яко Пастыреначальника, приими милостию Твоею души усопших раб Твоих, яко избранных слуг и строителей Тайн Твоих, предстоявших страшному престолу Твоему, совершавших безкровное священнодействие и подававших нам Святые и Животворящие Дары Твои - Честное Твое Тело и Честную Кровь Твою, во оставление грехов и в жизнь вечную; того ради молим Тя, Боже наш, соделай и их причастниками благодатных даров Духа Твоего Святаго во Царствии Твоем. Господи! Ты дал еси им власть во имя Твое прощати и отпущати нам грехи, вязати и решити, прилежно молим Тя: прости, отпусти и им согрешения их и не помяни грехопадений их; спаси и помилуй их по велицей Твоей милости; призри на них благосердием Твоим и приими их, Христе, под Твое благоутробие, яко учивших ны блюсти вся, елика заповедал еси нам; со святыми упокой в дому Твоем, яко домостроителей, смиренно подвизавшихся в насаждении и укреплении Православныя Веры и благочестия в сердцах наших; сподоби их неосужденно предстати пред Тобою на судищи Твоем, яко пред Пастыреначальником, и всели их в небесный Твой вертоград, яко насаждения масличная. Приведи их, Светодавче Господи, к невечернему свету Царствия Твоего, яко просвещавших ны светом Евангельским, всели их во Святый Твой град, яко вселявших в нас дух премудрости и разума, дух совета и крепости, дух ведения и благочестия, дух страха Твоего, - и даждь им наслаждатися от тука дома Твоего, яко питавших и наслаждавших души наша от божественныя Трапезы Твоея. Молим Тя, Царю, молитвами апостолов и пророков, святителей и учителей и всех святых, прослави их, яко служителей словесе во Святой Церкви Твоей, воинствующей на земли, прослави в Церкви, торжествующей на Небеси, и сопричти их к лику святых Твоих апостолов, святителей и учителей Церкви, послуживших и благоугодивших Тебе словом и делом. Аминь.